ورق العنب

اول شي المقادير :-

1 مرتبان ورق عنب ( انا بستخدم العلالي الفاخر افضل نوع )

2 كوب رز صنوايت ( منقوع لحد ما تسير حبة الرز بيضة و ليس شفافة )

نص (ضمة / باقة ) بقدونس مفروم ناعم

حبتين بصل حجم وسط مفرومين ناعم

حبتين بندورة حجم وسط مفرومين ناعم (بشيل شوي من لب البندورة)

8 ورقات نعنع مفرومين ناعم ازا مو متوفر حطي معلقة صغيرة نعنع ناشف مطحون

تلات فناجين قهوة زيت زيتون

تلات ارباع فنجان قهوة دبس رمان ( لا تحكو كتير لأنو هو سر النكهة الرووووعة )

معلقة صغيرة قرفة / رشة بهار مشكل / رشة كزبرة ناشفة مطحونة / معلقتين و نص صغار ملح
رشة فلفل ابيض او اسود مطحوون

عصير تلات ليمونات ( حسب الزوء بس انا بحبو حامض )

هلأ طريقة العمل بالخطوات

هاي البصل و البندورة و البقدونس المفرومين / ما كان عندي نعنع فريش فاستخدمت مطحون

بنحطهم بالطنجرة و بندير عليهم زيت الزيتون و دبس الرمان و الملح و البهارات اللي زكرتها فوقبنحطهم كلهم عالنار لحد ما يغلو ( يعني اول ما يغلو بنطفي النار عليهم و هالخطوة اخدتها من اشراقة امل بمنتدى تاني )

بعد ما نطفي النار على طول بنحط الرز المنقوع و المصفى من المي و بنحركهم سوا و بنتركهم لحد ما يبردو تماما

بعد ما تبرد بنحط كمية من الحشو بمصفاية عشان تنزل ميتها و تساعدنا باللف

و حاولو اضغطو بالمعلقة عشان تنزل المي
هلأ بنلفو بهالطريقة هلأ بنصف شرايح بندورة بالطنجرة ( ممكن تضيفو بطاطا و بصل )
و بنصف ورقات اليلنجي عليها بشكل مرتب و يكونو قراب كتير على بعض ما يكون بيناتهم فراغ عشان يطلعو متماسكين
و اللي بزيد من اوراق اللف او بطلع مثلا مقطوع و ما حينفع تلفيه لا ترميه حطيه فوق اليلنجي بعد ما تصفيه عشان ازا حطيتي صحن فيه زخرفة او الوان ما يصبغ عاليلنجي
هلأ بنحط صحن فوقهم و بندير عليه المي اللي تصفت من اليلنجي و احنا بنحشيه

هاي شكل المي بعد ما ندير المي اللي تصفت عاليلنجي بنعبي كاسة مي و بندوب فيها معلقة صغيرة ملح و بنديرهم كمان فوقهم و بنحطهم على اصغر عين عالغاز و على نار عالية لحد ما يغلو ( بعد هاي الخطوة بسير تحطو سنين توم مفرومين و شوية نعنع ناشف مطحون و معلقة مية بندورة بس انا استغنيت عنها )

بعد ما يغلو بنحسبلهم ساعة و نص و بنطفي عليهم
بعد ما نطفي بنحاول نصفي المي اللي ضلت بس بدون ما تشيلو الصحن عشان لا يسير لونو اسود
يعني هالحركة بدها حذر شوي
و هاي المي اللي زادت
و بنرجع غطا الطنجرة و بنسيبو ساعة و نص لساعتين يبرد ( لأنو ما بسير نشيل الغطا و هو سخن بعدين بقلب على سواد )

بنشيل الصحن اللي عليه و بنصفو في صحن التقديم او بايركس

انا هون معلش ما حطيتو بصحن تقديم لأني عملتو مبارح بالليل عشان نتغدى عليه اليوم

يعني حضرتو لأدخلو التلاجة

شوفو كيف بلمع ما شاء الله و لونو مو اسود
ملاحظة :-
المي اللي صفيناها من اليلنجي بعد ما استوى لا ترموها ، لاحزو انها اغلبها زيت . انا قبل ما ادخل اليلنجي التلاجة بدهنو منها عشان يضل رطب و طري

تم بحمد الله

يسلمووو مواضيعك حلوة ودايما تكون احلى واحلى

تسلمي يا توتو

ميرسي يا قمر